गोवा युवा महोत्सव आतां डिसेंबरांत, अंदूंचो 12-13 डिसेंबर

गोवा न्यूज खबरो | 19 September 2015 21:32 IST

अंदूंसावन गोंयांतलो सगळ्यांत व्हडलो म्हुणून धरतात तो कोंकणी भाशा मंडळाचो गोवा युवा महोत्सव डिसेंबराच्या म्हयन्यांत जातलो.

हाचे आदीं फाटलीं 20 वर्सां हो महोत्सव जानेवारीच्या दुसऱ्या वा तिसऱ्या सप्तकांत शेनवार-आयतारा जातालो.

ह्या वर्सा तो 12 आनी 13 डिसेंबराक जातलो. म्हणल्यारच ह्या एकाच वर्सा दोन युवा महोत्सव जातले. एक जानेवारींत जाल्लो आनी दुसरो आतां डिसेंबरांत जावपाचो.

ह्या 21व्या युवा महोत्सवाचें थळ रोकडेंच जाहीर करतलें अशें मंडळाचे अध्यक्ष चेतन आचार्यान सांगलां.

दोन मुखेल गजाली लक्षांत येतकीर भाशा मंडळान सगळ्या शिक्षण संस्थांक आनी सांस्कृतीक पंगडांक विस्वासांत घेवन हो निर्णय घेतला.

1. जानेवारींत महोत्सव जाले उपरांत खासा करून विद्यार्थी परिक्षेच्या मुडांत वतात आनी तांचे परिश्रम फकत युवा महोत्सवा पुरतेच मर्यादीत उरतात.

2. ह्या महोत्सवांत जावपी उत्कृश्ट नाच, नाटकुलीं, पथनाट्यां, गितां तशेंच हेर सादरीकरणां वेगवेगळे कडेन सादर करपाक मेळचीं अशे भाशा मंडळाक दिसता.

ह्या महोत्सवांत गोंयभरांतलीं उच्च माध्यमीक विद्यालयां, महाविद्यालयां आनी तरणाट्यांचे सांस्कृतीक पंगड वांटेकार जातात.

इतले मजगतीं कोंकणी भाशा मंडळाची चवथी अॅड्. अरुण सिंगबाळ यादस्तीक प्रस्नमाची सर्त 29 सप्टेंबरा जातली. 

उच्च माध्यमीक विद्यालय, म्हाविद्यालय आनी विद्यापीठ पांवड्यावयल्या विद्यार्थ्यांखातीर आशिल्ली ही प्रस्नमाची सर्त अंदूं पणजे इन्स्टिट्यूट मिनेझीस ब्रागांझा सभाघरांत जातली.

 

पोरूंचें जैतवंत धेंपे म्हाविद्यालय आनी इन्स्टिट्यूट मिनेझीस ब्रागांझाच्या जोडपालवान ही सर्त जातली. 

हे सर्तीच्या दरेका पंगडांत दोन विद्यार्थी आसपाक जाय. एके शिक्षण संस्थेक दोन पंगड धाडपाक मेळटले.

सर्तींत वांटेकार जाल्ल्या सर्तकांक प्रमाणपत्रां तशेंच जैतिवंतांक इनामां भेटयतले. सर्तकांनी लेखी चांचणी परीक्षा दिवप बंधनकारक आसा. चांचणी फेरयेंत उत्तीर्ण जाल्ले पंगडच उपरांत सर्तींत वांटेकार जातले. 

29 सप्टेंबरा सकाळीं 8:45 वरांचेर नोंदणी सुरु जातली आनी चांचणी परिक्षा सकाळीं 9 वरांचेर सुरू जातली.

शिक्षण संस्थांनी पावयल्ले हे अर्ज 24 सप्टेंबर मेरेन [email protected] हे ईमेलाचेर धाडचे अशें आयोजकांनी कळयलां. अदीक म्हायती खातीर 9765302627 (ह्रषिकेश) वा 9923442746 (अन्वेषा) हांकां फोन करचो अशेंय कळयलां.

Drop a comment

Enter The Code Displayed hereRefresh Image


Previous Comments

As always it will be best....yuva mahotsav asoch gaaztalo....fakt hea vorsa December mhoinean dovorla mhunn matshe kasheshe disle...karan colegin funweek tashench Kay colleginche events teach mhoineant ani achanakho schedule aso change zala....but no issues....Karan Konkani chea vavrak Ami sadhanch tayar!!! All d very best..

- steffi cardoz, ponda | 24 th September 2015 22:19

 

Latest News

Yuva Mahotsav