सगलें आतां इतिहासजमा

Posted By नयना आडारकार | 15 March 2012 16:23 IST

म्हज्या घरामुखार झाडां

झाडार साबार सवणीं

रान्नीपोलांत कुंयणीं

रानांत रोयणीं

सगलें आतां इतिहासजमा!

 

म्हज्या दारांत आंगण

आंगणांत रांगोळी

नागपंचमीक पातोळी

काट्टांची दिवाळी

सगलें आतां इतिहासजमा!

 

म्हज्या घराकुशीक शेजारी

माया ममतेचे पुजारी

उल्याक धांवप

गरजेक पावप

सगलें आतां इतिहासजमा!

 

आतां फ्लॅटांनी सजल्यांत शारां

शेजरा-शेजरांचीं बंद दारां!

भितर वाझांनी बॉन्साय-कॅक्टस

शेजारधर्म मात

जाला आतां इतिहासजमा!

 

आतां म्हजें घरूय फ्लॅटांत गेलां

आनी हांवूंय आतां फ्लॅटूचशें जालां

काळजा कुरकुटांत जपिल्लें

घराचें घरपणूय

जालां आतां इतिहासजमा!

 

केन्ना केन्ना इतिहासाची

पानां परतितना

दोळ्यांतल्यान घळ्ळ जावपी

दोन दुकांय एक दीस

जातलीं दिसता इतिहासजमा