बनखणबंद हांसप
Posted By रमेश वेळुस्कार | 01 January 2012 19:26 IST
पांडुरंग पांडुरंग गुड मॉर्निंग
धर्तर घुंवता टर्निंग टर्निंग
आवाज आयकतांच
हांवें हो आवाज
खंयच्यान येता काय
तें पळयलें
पळय जाल्यार
कोण ना
कोणाचोय काय आसना हो आवाज
आसलो मात
चित्तचोर
म्हाका कळना
हांगा तर कोण ना
जाल्यार परत हो आवाज जालो
मनीस तर हांगा कोण ना
आनी हो मनशांचो आवाज
इतलो ओडलायणो
हांव ताका सोदूंक लागलों
पळय जाल्यार
हो आवाज एका पांदर्यांतल्यान येतालो
पांदर्यांतले दांडयेर
आपल्या लिपिस्टिक लायल्ल्या वंठांनी
दोळे धांकून
भजन म्हटलेलेवरी
तो हीं उतरां
भावार्थान म्हण्टालो
पांडुरंग पांडुरंग गुड मॉर्निंग
धर्तर घुंवता टर्निंग टर्निंग
पांडुरंगाचें हें गीत
तर किरान सुंदरच घडलां
हांवें त्या किराक विचारलें
आरे बाबा तुजो आवाज तर
अतिमदूर आनी गोड
ते भायर
आनी एक खाशेली गजाल
तुज्या गळयांत आसा
ती म्हटल्यार
तुज्या आवाजांतल्या
जाणिवांची खरसाण
मनशा परसूय खर
म्हणून म्हण्टां
तुजी तुस्त
करता तितली थोडी म्हणची पडटली
कीर
म्हजेर दोळे मोखून
म्हाका पळोवंक लागलो
आनी मागीर
खो खो करून
चक्क हांसपाक लागलो
ताच्या ह्या हांसपान
म्हज्या विचारांची न्हीद खळयली
म्हाकां कळळें ना
तो म्हाका हांसला
काय सवन मनीस जातीक हांसला
काय मनशांच्या
सांस्कृतीक हट्टीपणाक हांसला
तेंच कळळें ना
इतलें खरें की
तो आपले वांकडे चोंचीन
म्हजें रुंवान रूंव
खोंचून खोंचून चोंचता
अशें म्हाकां दिसपाक लागलें
मनीस हांसता कित्याक
तेंच कळना
ह्या संवसारांत
आनीक खंयच्याच जनावराक
हांसपाक कळना
सोडून मनीस
नाय म्हटल्यार
सुणो केन्ना केन्नाय
हांसता कसो दिसता
पूण खर्या अर्थान
तो हांस ऽ ना
तें दिसप
हो मनशाचो भ्रम आसता
हे म्हज्या किरा
हे म्हज्या शब्दधरा
हें हांसप
तुका कोणे शिकयलां
मनशान
काय आनी कोणे
आनी तो तर
फकत हांसता
हांव ताचेकडें
उलोवपाचेय लायकीचों उल्लों ना
अशें बी
ताका दिसूंक ना मूं
अशें रावून रावून हांसपाचे
वेगळेच अर्थ उपरासूंक शकतात
आरे उलय मरे कितें तरी
किरान चोंच उकती केली
म्हणपाक लागलो
सद्याक म्हजें हांसप
बंदखणीत बंद आसा
तुमचे मदल्या कोणे तरी
म्हजें हें हांसप
ह्या भांगराच्या पांदर्यांत
बंद करून उडयलां
तुमच्या मनशांच्या मजेखातीर
जाका फकत
स्वताच्याच स्वातंत्र्याविशीं आस्था
आनी ताका
दुसर्याच्या स्वातंत्र्याविशीं
मात लेगीत पर्वा ना
म्हणून हांव हांसतां
किराचो कमेंट आयकून म्हजे
कान बंद जाले
म्हजे दोळे बंद जाले
आनी म्हजें
मनूय बंद जालें
